Foto/photo: Lydia Nine
Oficiala apero de la albumeto jOmO popumas la 10an de oktobro 2026
jOmO (Jean-Marc Leclercq) komencis sian muzikan karieron en 1977 (ludante en grupoj kiel Caniveau, Les Diam’s, Queen Bees, ktp.) kaj eklernis esperanton en 1988.
Tial estis tute nature por li decidi komponi kaj kanti en la Internacia Lingvo.
Komence de 1990 li fondis la grupon Les Rosemary’s Babies kun du aliaj muzikistoj (Éric «le Chien Fou» kaj El Rubio); la grupo akiris rekonon en la franca alternativ-roka medio, kaj kontraktis kun la diskeldonejo Boucherie Production.
La grupo koncertvojaĝis tra multaj landoj (inkluzive de Ĉinio), eldonis du albumojn, kaj eĉ koncertis en la fama pariza koncertejo Olympia.
La grupo registris ankaŭ du kantojn en Esperanto sub la nomo La Rozmariaj Beboj; tio markis la unuan eldonon de Vinilkosmo en 1990, aperante en vinila kompilaĵo kun kvar kantoj, kie ili kunhavis unu flankon kun la legenda grupo Amplifiki.
jOmO denove aperis kun La Rozmariaj Beboj, kontribuante per esperanta kanto al la kompilaĵo Vinilkosmo-kompil’ Vol. 1 (1995), kaj la sekvan jaron aperis kiel solo-artisto en Vinilkosmo-kompil' Vol. 2 (1996) per kanto verkita de Marcel Redoulez.
Post la disiĝo de la Beboj, jOmO fondis novan grupon, Liberecanoj. Kun ili li registris albumon kun sep kantoj pri liberecanaj temoj por Vinilkosmo, kaj starigis rekordon pri plurlingva koncerto (22 kantoj en 22 lingvoj), atingo rekonita en la Guinness-libro de rekordoj en la jaro 2000. Poste, laborante kiel solo-artisto, li registris tute esperantan albumon titolitan jOmO friponas ĉe la nova studio de Vinilkosmo; ĝi aperis fine de 2001. Lia sekva albumo, jOmO slavumas, aperis printempe de 2006; ĝi prezentas slavstilan grupon, kun kiu jOmO koncertas.
En 2010, kunlaborante kun Mayoma el la Demokratia Respubliko Kongo, jOmO komponis muzikon por kantoj verkitaj de Mayoma kaj prezentis ilin; tiuj estis eldonitaj de Vinilkosmo en la muzikalbumeto (EP) Mayoma kun jOmO afrikumas kaj ankaŭ inkluzivitaj en la kompilaĵo Afrika kompilo.
Lia kvara Esperanta albumo, jOmO okcitanas, estas havebla ekde la 1-a de aprilo 2016; ĝi dediĉas sin al tradicia okcitana muziko kaj prezentas la budegon-on, specon de sakfajfilo el la regiono Langvedoko. jOmO koncertis kun plena budeg-ensemblo ĉe la Universala Kongreso de Esperanto en Lille en julio 2015. Li daŭre koncertas, kaj en esperanto kaj en multaj aliaj lingvoj, kiel soloisto kun sia gitaro, kantante gajajn, danceblajn kantojn. Li vojaĝas tra la tuta mondo: li vizitis Japanion, Aŭstralion, Sud- kaj Nord-Amerikon, Rusion, Ukrainion kaj preskaŭ ĉiun landon en Eŭropo.
En 2021 aperis lia dua muzikalbumeto, MArta kaj JOmo kantas MAYOMA-n, plia kunlaboro kun Mayoma, kiu prezentas kantojn de Mayoma kun muziko de jOmO, kantatajn en esperanto kaj de li mem kaj de lia filino Marta.
Lia nova albumo, jOmO popumas, registrita kun gitaristo el la grupo Liberecanoj kaj kun lia filino kiel kantistino, omaĝas la muzikon kiu inspiris lin ekaperi sursceneje: la muzikon de la 1960-aj kaj 1970-aj jaroj. Tio estis la krepusko de la hipia movado, epoko de grandega kreivo kaj intelekta fermentado, regata de la lukto kontraŭ la Vjetnama Milito.
Krom muziko, li publikigis konversacian lernolibron en la gaskona lingvo ĉe franca eldonejo; temas pri lingvo, en kiu li ankaŭ verkas. En majo 2006 li publikigis sian unuan romanon, Ucraïna, en la gaskona, kaj gajnis literaturan premion pro tiu verko. En 2012 li publikigis rimaron por la okcitana lingvo. Li estas ankaŭ aŭtoro de libro en la franca titolita Toulouse est le Centre du Monde (Tuluzo estas la centro de la mondo), kies eldono estas planita por la fino de 2026 ĉe eldonejo bazita en Barcelono.
Pri liaj personaj aferoj: li havas polan edzinon; li nek fumas, nek trinkas alkoholon, nek manĝas viandon; tamen li havas unu malbonkutimon: li ŝategas babili.
Klaku sur la albumojn por ilin aŭskulti aŭ elŝuti.
